سلسلة الحكم والامثال السودانية الجزء الثاني

ظلت موروثات أهل السودان منذ القدم بصمة تميزهم عن باقي الشعوب العربية والافريقيه،ففصاحة أهل السودان جعلت جُل اقولهم تنزل كالدُر المنثور للمتلقي ،منتظمه كمصفوفه بديعه كلمات لها رونق وشجون أخاذ ،ظلت الحِكم والأمثال الشعبية السودانيه خالدة في الذاكرة ،يتوارثها الأجيال جيل بعد جيل ،يتداولونها في أقوالهم يحملونها معهم في حِلهم وترحالهم كالوصيه .

سلسلة الحِكم والأمثال السودانية 

وفي هذه الزاوية سنعرج علي تكملة مابدأناه في المقال السابق من سلسة الحِكم والأمثال السودانية يمكنك الاطلاع على بداية سلسلة الحكم والأمثال السودانية من هذا الرابط

محتويات المقال:- 

• المقدمة
• حكم وامثال سودانية وشرح معانيها
• الارتباط الوجداني للشعب السوداني بالحكم والأمثال الشعبية

الحكم والامثال السودانية 

يقول أهل السودان

الخريف اللين من رشاشه بين ومرادف له

المطر من رشته والولد من تبّته وحينما يقولوا تبّ بالتشديد اي من قومة جهلوا ويقصدوا بيها أنه المطر لو كان قوي أو كثير من بداية رشه ليهو والولد لو كان صالح أو طالح من قومة جهلوا.

خربانه ام بناياً قش ويقصدوا بيها الدنيا اي بمعني زايله وزايل نعيمها.

الفلهمه العورا شيل البطاريه في القمرا وتقال لمن يأتي بشي مخالف غير موضعه ،وقديما كانت تقال لمن يحمل بطارية الحجار "مصباح"في أوقات ضوء القمر .

المراه لو بقت فاس ما بتقطع الرأس والمرأة مرا من الباب للضرا  وهذه الأمثال الاثنتين تصفان المرأة فاولهم يصف أن المرأة رغم حدتها لا تستطيع أن تفعل شي فهي رقيقه،والمثل الثاني يصف المرأة الحقيقة أن مكانها من الباب باب بيتها الي الضرا وهو أيضاً داخل البيت .

قبل تختار طريقك ابقي واثق من رفيقك دلاله علي الاختيارات الصحيحه في الأصحاب والإخوان وحتي الزوجه

ومرادف له مثل آخر يقول المابقيف معاك وقت الشمس تلفح لفح ما تصدقوا والجوء سمح

شجر الدوم برمي ضلوا بعيد.

وتقال لمن يُنفق خيره لابعد الحدود والبعد الناس. وفُسرت في مناطق أخري بالشخص الذي لا يتصدق لعشيرته إنما يتصدق للغُرباء

ويقال أيضاً فلان الفي أيدوا ما حقتوا دلاله علي كثرة السخاء في مايملك وكثرة الجود والكرم ،واهل السودان جميعاً أهلاً لذلك.

السعفه بربطوها خضراء وتقال للمتزوج حديثاً في نصحه لتأديب زوجته اربط السعفه خضراء اي قبل تجف وتقسي بمعني افرض هييتك عي زوجتك قبل تقوا عليك.

الطشاش في بلد العمي شوف بمعني الرجل قليل التعلم في بلاد أو منطقة أهلها يعمهم الجهل بمثابة عالم لهم فيقال طشاش في بلد عمي شوف .

لسانك حصانك أن مسكتوا صانك أو طلقتوا هانك للدلالة علي أن كثرة الكلام لا يأتي منها خير غير إهانة نفسك واذلالها،والعكس صحيح ،فيقال أيضاً إذا كان الكلام من فضه فالسكوت من ذهب

العين ما بتعلي علي الحاجب 

يقولوها دائماً مشايخة القبائل والأمهات وهن ينصحن بناتهن أو لكل من اراد ان يتخطي كلام كبار قبيلته أو بيته أو للمرأة البتتخطي كلام وليانا.

كان صبحت علي همك القديم نعمه من الكريم.

فحال الدنيا كل يوم مصيبة جديده فلو همك حق أمس قاعد احمد علي ربك أنه ماجاك هم تاني جديد.

ساعد النصاري ولا تقعد خساره

تشجيع علي تقديم يد العون والمساعدة للناس ومرادف له مثل آخر يقول عطالتك عين بيها عدوك.

البباري الدجاج بودي الكوشه.

الما بتشيلها الخمسه تبيت وتمسي ،وتقال لمن أضاع شي بمعني الخمسه اصابع اليد لو حاجتك صغيره الاصابع ما بشيلنها تبيت وتمسي بتلقاها في مكانها وهذا من اجمل الأمثال الشعبية السودانيه.

ناموسه في قعر اضان "اُذن"

ويقال لمن يلفح الكلام أو يسترق السمع وكثير نقلا للحديث والقواله كما يقول أهل السودان والقواله بمعني القطيعه أو النميمه .

الشراب من ايد الرجال عطش 

ويقال لمن ينتظر الاعانات من أهله وأصحابه ،ولا يعتمد على نفسه في جلب الرزق والعمل.

الدايرك في مصلحه في الخلاء بجيب ليك مروحه.

بدع ام بدوع شيل القُله وقز الكوع والقله بضم القاف هي تماماً مثل الزير ولكن اصغر حجماً.

وسخان القلب ما بغسلوا الصابون.

والجاية من السماء تتحملها الأرض.

القرماضه ولا الرقاده ويقصد به القرماضه الشاه التي تأكل كل شي وكما يقولوا ترمرم كل شي احسن من الرقاده المابتاكل .

وكنايه للرجال احسن الرجل البشتغل اي حاجه احسن من البرقد عاطل بدون شغل.

اسرار قمريه اتلاقوا في الرعيه اي أن صوت القمري يسمعه كل من يمر به .

الضايق الدبيب يخاف من مجر الحبل .

البيربي الحمار لابد يجيبلو قش

يشبه 

البيربي المحن لابد يلولي صغارا

مصيروا الضفر ما بطلع من اللحم بقولوها نصيحه للزول المحارب اخلوا ومخاصمن.

امثال متفرقة 

عز العرجاء لمراحها ومرادف له مثل آخر في الوزن الني للنار

بجاه الملوك نلوك،لمن يعيش علي نعمة غيره.

البتفولحلك اتبوهملوا.

جبل الكُحل هدنوا المراويد والمرواد كما هو معروف بمعناه ماتكحل به المرأة عيونها.

كل ديك في بلدوا عوعاي.

وكل شوكه بمرقوها بدربها.

السن بتضاحك نديدها.

لالوب بلدنا ولا تمر الناس اييقال لمن ينظر لذاد غيره فاللالوب ثمرة أقل من التمر ثمناً.

اروع بقيدك

تعدي تمديد تعشي تمشي وتفطر تبطل.

البتقدر علي ديتوا اكتلوا.

الماشفتوا في بيت ابوك بخلعك.

لو عندك حيله اعمل تيله.

تفتش للغريق وتلقي المطفح فات مرادف ليه الجفلن خلهن أقرع الواقفات.

مرمي الله المابترفع يقال لمن أراد به الناس خيرا وهو عدوا لنفسه .

اسمك خصمك يا علمك الدغاله ياعلمك الهباله.

كان عشقت اعشق قمر وكان سرقت أسرق جمل

القُفه ام اضنين بشيلوها نفرين.

العندوا ضهر ما بندق علي بطنوا

خربانه من كبارها.

شلاقة الورل الفيهو اربعه كرعين ويمشي علي بطنوا .

الخيروه حيروه.

شن جدا في المخده التنجيد ولا الكيس الجديد.

 امثال متفرقه من أهل غرب السودان 

الدنيا دبنقا دردقي بشيش ويعني الدبنقا هو إنا من الفخار بمعني تعامل معه برفق حتي لا ينكسر وهكذا الدنيا تحتاج لمسايسه برفق .

الكبر بجهله وا شقاوة أهله.

ايام الزمن زين والشعر مغطي الاضنين.

الفشاء غبينتوا خرب مدينتوا.

المابعرف ما تديهو يقرف.

في الوش حبايب وفي القفي دبايب.

ام جركم ما بتاكل خريفين.

لبس الطين في الكرعين ما ببقي نعلين الكرعين *"الرجلين"

الاضينه دقوا واعتزر لي 

الارتباط الوجداني للشعب السوداني بالحِكم والأمثال الشعبية السودانيه 

الأمثال الشعبية تعكس عادات وتقاليد وثقافات الشعوب ،علي اختلافاتهم العرقيه والطبقيه فنجد أن الأمثال الشعبية قديما في كل منطقة كانت تدور عن شي معين يرتبط ارتباطاً لصيقا بتلك المنطقة ،وماندر ما نجد امثال متفرقه خارج محيط البيئة المحيطة لتلك المنطقه،كما أن الاعراف والتقاليد السائدة تطغي علي الأمثال فالكرما والشجعان مثلاً نجد أن معظم أمثالهم الشعبيه تدور حول هاتان الصفتان مثلاً فيقولاوا مثلاً لقمه هنئيه تكفي مئه واحيانا أخري ذهب بعض المورخين أن الارتباط يكون بصفات الأشخاص أو القبيله في قول محايد للقول الأول الذي ذكرته وهذا الأرجح والاقرب للمنطق ،فمن يُطلق مناسبة المثل في وقته أو في أوانه يكون قد تشبع بتفاصيل تلك المناسبة فأطلق قوله بفطنه فأصبح كلام سائد يقال كلما أتت مثل تلك المناسبة في خاطر الناس .

لم تكن الأمثال الشعبية السودانيه ،مجرد اقوال قيلت في مناسبه فحسب بل تعد مدرسه لتعليم الأجيال الأصول الصحيحه والقيم والعادات الاجتماعية التي توارثوها أجدادنا فأصبحت لنا بمثابة ثوابت لا نتخطاها أبدا.

بلادي سهول بلادي حقول

بلادي الجنه للشافوها 

او للبره بيها سمع 

بلد ناسا تكرم الضيف 

وحتي الطير اجيها جعان 

من أطراف تقيها شبع 

وديل اهلي وان ما كنت من ذي دي وااا اسلاي وااا ماساتي وا ذلي